ፕሬስ ሪሊዝ
ወዲያውኑ ጥቅም ላይ የሚውል!
የፕሬስ ቢሮ፣ የኢትዮጵያ ቡናና ሻይ ባለሥልጣን (ECTA) አዲስ አበባ፣ ኢትዮጵያ ኢሜይል፦ info@ethiocta.gov.et | ድረ-ገጽ፦ www.ethiocta.gov.et
የካቲት 25 ቀን 2018 ዓ.ም.
የኢትዮጵያ ቡናና ሻይ ባለሥልጣን ለአምራቾችና አቀናባሪዎች ስልታዊ ስልጠና በመስጠት የቡናውን ዘርፍ ሽግግር አፋጠነ
ጅማ፣ ኢትዮጵያ — የኢትዮጵያ ቡናና ሻይ ባለሥልጣን (ECTA) ከፎለር (FOLUR)-ኢትዮጵያ ፕሮጀክት ጋር ባደረገው አጋርነት፣ የቡናውን የዕሴት ሰንሰለት ለማዘመንና የአካባቢ ጥበቃ ደህንነትን ሥርዓት ለማስያዝ የተዘጋጀ የአቅም ግንባታ ንቅናቄ መጀመሩን ዛሬ አስታወቀ።
ይህ ስልታዊ የስልጠና መርሃ-ግብር በዘርፉ ለሚታየው "የምርታማነትና የጥራት ክፍተት" እንዲሁም ከደን ጭፍጨፋ ነፃ ለሆነና ዘላቂነት ላለው ቡና ያለውን ዓለም አቀፍ ፍላጎት ምላሽ ለመስጠት የታለመ ነው ተብሏል።
ኢትዮጵያ በ2033 የኤክስፖርት ገቢን በአራት እጥፍ ለማሳደግ ያለመችውን የቡና ስልታዊ ዕቅድና ፍኖተ ካርታ ተግባራዊ እያደረገች ባለችበት ወቅት፣ በዘርፉ ወሳኝ ፈተናዎች ማለትም ባህላዊ የአመራረት ዘዴዎች፣ የተቀናጀ የአቅርቦት ሰንሰለት እጥረት፣ እንዲሁም እንደ የአፈር መሸርሸርና የውሃ ብክለት ያሉ የአካባቢ ተጽዕኖዎች የኢትዮጵያ አነስተኛ አምራቾችን ተወዳዳሪነት ሲገቱ ቆይተዋል። በተጨማሪም፣ የአውሮፓ ህብረት የደን ጭፍጨፋ ደንብ (EUDR) ጥብቅ የክትትልና የቁጥጥር መስፈርቶችን ተግባራዊ ለማድረግ መዘጋጀቱ፣ በቴክኖሎጂ የላቀና በሥነ-ምህዳር ረገድ ተጠያቂነት ያለው የዕሴት ሰንሰለት መገንባት ይበልጥ አስፈላጊ ማድረጉ ከመፈፀም ተግዳሮቶች የሚጠቀስ ነው።
የባለሥልጣኑ ም/ዋና ዳይሬክተር ክቡር አቶ ሻፊ ዑመር በመክፈቻ ንግግራቸው "ይህ ስልጠና እውቀትን ከመቅሰም ባለፈ በሀገራዊ ፖሊሲና በመስክ ተግባራት መካከል እንደ ወሳኝ ድልድይ ሆኖ የሚያገለግልና አምራቾቻችንንና አቅራቢዎቻችንን በተለያዩ የግብርና ክህሎቶችና አካባቢን በማይበክሉ የአዘገጃጀት ዘዴዎች በማብቃት፣ ኢትዮጵያ ጥራትና ዘላቂነትን ለሚያደንቀው ዓለም ቀዳሚ የልዩ (Specialty) ቡና ምንጭ ሆና እንድትቀጥል የሚያደርግ ነው" ብለዋል።
አቶ ሻፊ አክለውም ስልጠናው በአጠቃላይ የዕሴት ሰንሰለቱ ላይ ትኩረት ያደረገ በመሆኑ በቡና ምርት ምርታማነት እና ጥራት ላይ ትኩረት በማድረግ በሳይንሳዊ መንገድ ዘመናዊ የግብይት ስርዓት በመጠቀም ስንገበያይ መሆኑን አበክረዉ ገልፀዋል ።መ/ዋና ዳይሬክተሩ ቡናን በጥራት ማምረትና በጤናማ መልኩ መገበያየት መቻልን ለቀጣዩ ትውልድ ማስተላለፍ የቡናችን ብራንድ ማስጠበቅ ይገባል ብለዋል።በያዝነው በጀት አመት የቡና ሽፋን ምርትና ምርታማነት እንዲሁም የገቢ መጠን እመርታዊ ለውጥ የተገኘበት ቢሆንም የገበያ ትንታኔዎች እንደሚያሳየው የአለም የገበያ ዋጋ እየቀነሰ በመምጣቱ ቡናችን አውጥተን የገቢ እና ወጪ ስሌታችንን አስልተን በተሻለ የምንጠቀምበትንና በትንሽ ኪሳራችን የምንለይበት መረጃዎችን በመመስረት ልንሰራ እንደሚገባ አስምረው አሳስበዋል - አቶ ሻፊ።በመጨረሻም በስልጠናው የተገኘውን ዕውቀት ተግባራዊ ማድረግና ወደታች ማውረድ እንደሚገባ ገልፀው ስልጠናውን በይፋ ከፍተዋል ።
በዓለም አቀፍ የአካባቢ ጥበቃ ተቋም (GEF) እና በተባበሩት መንግሥታት የልማት ፕሮግራም (UNDP) በኩል በፎለር (FOLUR)-ኢትዮጵያ ፕሮጀክት የሚደገፈው ይህ ስልጠና በዋናነት የኢትዮጵያ ቡና አምራች አካባቢዎችን ኢላማ ያደረገ ሲሆን በሚሊዮኖች የሚቆጠሩ አነስተኛ አርሶ አደሮች ከባህላዊ ዘዴዎች ወጥተው "ብክነት ወደሌለው" (Zero-waste) የንግድ ሞዴል እንዲሸጋገሩ ለማብቃት የታሰበ ነው ተብሏል ።
ይህ የስልጠና ዑደት ሲጠናቀቅም ተሳታፊዎች የቆሻሻ አወጋገድ ሥርዓቶችን ተግባራዊ ለማድረግና ምርት ከተሰበሰበ በኋላ የሚከሰተውን ብክነት ለመቀነስ ዘመናዊ የማከማቻ ዘዴዎችን ለመጠቀም የሚያስችል ቴክኒካዊ አቅም ይኖራቸዋል። እነዚህ ማሻሻያዎች የኢትዮጵያን ልዩ የቡና ብዝሃ-ሕይወት እየጠበቁ፣ የአርሶ አደር ማህበረሰቦችን ኑሮ በከፍተኛ ደረጃ ያሻሽላሉ ተብሎ ይጠበቃል።
ዘገባው የተስፉ አለማየሁ ነው
